Hurmatli madaniyat va san’at sohasi fidoyilari, aziz ustozlar va iste’dodli ijodkorlar!

Sizlarni 15-aprel – O‘zbekiston Respublikasi madaniyat va san’at xodimlari kuni munosabati bilan chin qalbimdan samimiy muborakbod etaman!

Madaniyat va san’at – bu millatning yuragi, uning tarixiy xotirasi va kelajakka ishonchidir. Siz azizlar ana shu bebaho boylikni asrab-avaylab, uni yanada boyitib, xalqimizning ma’naviy dunyosini yuksaltirish yo‘lida sharafli va mas’uliyatli vazifani ado etib kelmoqdasiz. Sizlarning fidokorona mehnatingiz tufayli milliy an’analarimiz, urf-odatlarimiz, noyob madaniy merosimiz asrab qolinyapti, zamonaviy san’at bilan uyg‘unlashib, yangi bosqichga ko‘tarilmoqda.

Bugungi kunda mamlakatimizda madaniyat va san’atni rivojlantirish davlat siyosatining ustuvor yo‘nalishlaridan biriga aylangan. Sohani tubdan modernizatsiya qilish, moddiy-texnik bazani mustahkamlash, madaniyat maskanlarini rekonstruksiya qilish, ijodkorlar uchun munosib shart-sharoitlar yaratish borasida izchil islohotlar amalga oshirilmoqda. Bu ezgu ishlarning samarasi, avvalo, sizlarning tashabbuskorligingiz, izlanuvchanligingiz va kasbga bo‘lgan sadoqatingizda namoyon bo‘lmoqda.

Ayniqsa, yosh avlodni milliy va umuminsoniy qadriyatlarga hurmat ruhida tarbiyalash, ularning qalbida san’atga mehr uyg‘otish, iste’dodlarini ro‘yobga chiqarishda sizlarning o‘rningiz beqiyosdir. Sizlar nafaqat ijodkor, balki ma’naviyat targ‘ibotchisi, qalblarga ezgulik va go‘zallik urug‘ini qadovchi ulug‘ insonlarsiz.

Namangan viloyatida ham madaniyat va san’at sohasini rivojlantirish, yangi loyihalarni hayotga tatbiq etish, iste’dodli yoshlarni qo‘llab-quvvatlash, madaniyat muassasalari faoliyatini yanada takomillashtirish borasida tizimli ishlar olib borilmoqda. Ushbu yutuqlarning asosida sizlarning tinimsiz mehnatingiz, ijodiy izlanishlaringiz va fidoyiligingiz yotadi.

Har bir sahna ortida, har bir asar zamirida, har bir tadbirda sizlarning qalbingizdagi ilhom, xalqimizga bo‘lgan cheksiz muhabbat va Vatanga sadoqat mujassam. Sizlar yaratgan san’at asarlari inson qalbini tarbiyalaydi, jamiyatni birlashtiradi va kelajakka umid bag‘ishlaydi.

Fursatdan foydalanib, barchangizga mustahkam sog‘lik, uzoq umr, oilaviy baxt-saodat, tinchlik-xotirjamlik hamda bitmas-tuganmas ilhom tilayman. Yaratayotgan har bir asaringiz, amalga oshirayotgan har bir ezgu tashabbusingiz yurtimiz ravnaqi va xalqimiz farovonligi yo‘lida xizmat qilsin!

Sizlarning sharafli mehnatingiz doimo yuksak qadrlansin, e’tibor va e’zoz markazida bo‘lsin!

Bayramingiz muborak bo‘lsin, aziz madaniyat va san’at namoyandalari!

Hurmat bilan,

Sarimsakov Ziyovitdin Sadridinovich, Namangan viloyati Madaniyat boshqarmasi boshlig‘i