1-yanvar O‘zbekiston Respublikasida umumxalq bayrami va rasmiy dam olish kuni sifatida keng nishonlanadi. Mazkur sana yangi kalendar yilining boshlanishi munosabati bilan belgilanadi hamda mamlakat hududida davlat, jamoat va xususiy tashkilotlar tomonidan turli madaniy-ma’rifiy, ma’naviy hamda ko‘ngilochar tadbirlar tashkil etiladi.

Yangi yil bayrami arafasida respublikaning barcha hududlarida, xususan, poytaxt Toshkent shahrida bosh archa bezatilib, ommaviy bayram dasturlari, konsertlar, teatr tomoshalari, bolalar uchun ertak qahramonlari ishtirokidagi sahna ko‘rinishlari o‘tkaziladi. Hududlarda markaziy maydonlar va madaniyat maskanlari bayramona bezatiladi.

Mazkur bayram ayniqsa bolajonlar uchun quvonchli sana hisoblanadi. Ta’lim muassasalarida “Yangi yil archasi” tadbirlari tashkil etilib, bolalarga sovg‘alar ulashiladi. Xayriya aksiyalari doirasida ijtimoiy himoyaga muhtoj oilalar farzandlari, mehribonlik uylari tarbiyalanuvchilari va nogironligi bo‘lgan bolalar uchun maxsus bayram dasturlari o‘tkaziladi.

Yangi yil bayrami doirasida mamlakatda ijtimoiy-iqtisodiy yakunlar sarhisob qilinadi, kelgusi yil uchun ustuvor vazifalar belgilanadi. O‘zbekiston Respublikasi Prezidenti tomonidan xalq tabrigi e’lon qilinadi hamda davlat mukofotlari topshirilishi mumkin.

O‘zbekiston Respublikasining mehnat to‘g‘risidagi qonunchiligiga muvofiq 1-yanvar rasmiy dam olish kuni hisoblanadi. Dam olish kuni boshqa ish kuniga to‘g‘ri kelgan taqdirda, amaldagi tartib asosida ko‘chirilishi mumkin.Shu tariqa, Yangi yil bayrami mamlakatimizda aholi birdamligi, ezgu tilaklar va kelajakka ishonch ramzi sifatida keng nishonlanadi.

Azizbek Abdug'aniyev, Namangan viloyati Madaniyat boshqarmasi Matbuot kotibi, Jurnalist