Navro‘z umumxalq bayrami

  21-mart O‘zbekiston Respublikasida Navro‘z umumxalq bayrami sifatida keng va tantanali ravishda nishonlanadi. Navro‘z – sharq xalqlarining eng qadimiy bayramlaridan biri bo‘lib, tabiatning uyg‘onishi, kun va tun tenglashuvi hamda yangi hayot faslining boshlanishini anglatadi. Ushbu bayram asrlar davomida xalqimizning milliy qadriyatlari, urf-odatlari va an’analari bilan uyg‘unlashib, ma’naviy merosimizning ajralmas qismiga aylangan.

  Navro‘z so‘zi fors-tojik tilidan olingan bo‘lib, “yangi kun” ma’nosini anglatadi. Bu sana bahorning kirib kelishi, dalalarda ishlarning boshlanishi, yangilanish va poklanish ramzi sifatida qadrlanadi. 

  Namangan viloyatida ham yuksak shukuh va ko‘tarinki ruhda keng nishonlanadi. Bahorning kirib kelishi, tabiatning uyg‘onishi va yangilanish ramzi bo‘lgan Navro‘z viloyat aholisi tomonidan qadimiy an’ana va urf-odatlarga sodiq holda qarshi olinadi.

  Navro‘z arafasida viloyatning barcha tuman va shaharlarida obodonlashtirish, ko‘kalamzorlashtirish hamda xayriya tadbirlari o‘tkaziladi. Mahallalarda hasharlar tashkil etilib, ko‘chalar va xiyobonlar tartibga keltiriladi, yangi daraxt va gullar ekiladi. Bu jarayon aholi birdamligi va hamjihatligining yorqin ifodasidir.

  Bayram kuni viloyat markazi – Namangan shahrida asosiy tantanalar o‘tkaziladi. Markaziy maydonlar va madaniyat maskanlarida teatrlashtirilgan tomoshalar, folklor jamoalari chiqishlari, milliy qo‘shiq va raqs dasturlari namoyish etiladi. Shuningdek, sport musobaqalari, milliy kurash bellashuvlari hamda xalq o‘yinlari tashkil etiladi.

  Namangan viloyati azaldan bog‘-rog‘lari, gullari va hunarmandchiligi bilan mashhur. Navro‘z bayrami kunlari viloyatning xushmanzara hududlaridan biri – Bobur nomidagi madaniyat va istirohat bog‘i hamda boshqa sayilgohlarda ommaviy sayillar tashkil etiladi. Hunarmandlar ko‘rgazmalari, milliy taomlar yarmarkalari, ayniqsa sumalak sayillari keng o‘rin oladi.

  Viloyatdagi ta’lim muassasalari, madaniyat markazlari va tashkilotlarda “Navro‘z sayli” dasturlari o‘tkazilib, yoshlar qalbida milliy qadriyatlarga hurmat, Vatanga muhabbat tuyg‘ulari mustahkamlanadi. Ijtimoiy himoyaga muhtoj oilalar, nuroniylar va faxriylar holidan xabar olinib, ularga bayram sovg‘alari topshiriladi.

  Shu tariqa, Navro‘z umumxalq bayrami Namangan viloyatida milliy an’analarga sadoqat, ezgulik va saxovat tantanasi sifatida keng nishonlanib, hudud aholisi o‘rtasida hamjihatlik va do‘stlikni mustahkamlashga xizmat qilmoqda.

Azizbek Abdug'aniyev, Namangan viloyati Madaniyat boshqarmasi Matbuot kotibi, Jurnalist